دسترسی ها

دکلمه سروک ویلون از هومیر | فایل صوتی همراه متن

Servake Veiloon – Hoomir

شعر و دکلمه : هومیر

بمناسبت درگذشت استاد سجاد رزمجو

متن دکلمه سروک ویلون از هومیر :

کوه ی طاسک بغل کوه ی دنا جا نگرو
شور برنوی سجاد ، شور تماشا نگرو

شیر زرد هنر افتاس وری گل تیمو
حیفم وی شیر که یه جفت شیر نر وش پا نگرو

من ایلم د کسی نیسه که جاشه بگره
نی علی نه که بیا پشت ککاشه بگره

دیش برنایه کمر ، شیرَه جَوونش مرده
دهس بی رحم اجل شیره ی جونش برده

وُرد آواز دَ بعد از تو چه بی نوم آبی
قوم لر بی کس و بی ره و سرانجوم آبی

سوهت سیمرغ صدا من تش بی دی چه کنم
خشک وابی غزلِ چشمه ی سیبی چه کنم

لاک و لیکی من هفت لشکر لر گهرهسه
چایرِ من سر شاهنومه ی لر دهرهسه

گلی شاه پر آوازه ی لر ترزهسه
رنگ و ری یه زن و مرد ، دوور و کر پهرهسه

همه مو غم زده ییم سیکه ککامو مرده
سیکه اسطوره ی اواز صدامو مرده

سوهت و ترزهس همی خاطریلمو امشو
خاطره ی خوب همه بچگیلمو امشو

شور برنو من کوه شور زمهسون خوسی
سره ی ایل ، منِ سروک ویلون خوسی

زر گلِ سرد ، لش بلبل خش خون خوسی
بت خش خون زرِ هوفه ی چیمون خوسی

وای اسطوره اواز و دهسلمو ره
یه تلی خهک و خرونگ کرد و منِ تلمو ره

دهس و لیکه بزنیتون بگریویتون سیش
پهلله کُل بتراشیت ، ببریزیتون سیش

بگو صد مرد سوار وا تش و برنو ویسه
صد هزار مرد وگیر تا من او گو ویسه

زن شیون کنِ دلسوز بگو رَو رَو ویسه
طول چپ و شیون و او ناله ی بوبو ویسه

بلبلم مرد کمی نیسه خدا خوش دونه
کوه دنا من غمش ایریسه خدا خوش دونه
آسمون من غمش ایخیسه خدا خوش دونه

ای زمین ای لش حرومت چه و ایلم کردی
و خرابی بره نومت چه و ایلم کردی
تف مِن ای قسمت شومت چه و ایلم کردی